Purified In Blood tek eit steg inn i det bekmørke og meir brutale med nytt materiale

Folkens. Demoar er ikkje ofte eg skriv om - trur faktisk dette blir aller første gongen. Eg intervjua vokalist Hallgeir frå Purified In Blood her om dagen og fekk sendt over ein demo som eg har fått lov til å preika litt om. Me berre køyrer på:

Purified er kjent for å halda det fengjande og hardt - der er dei framleis. Men det er noko dystrare og mørkare over det nye materialet - noko meir brutalt. Dette er heftige greier, på grensa til solid svartmetall! Riffa river seg inn i øyregangane dine med makt og tvinger seg inn i minnet ditt - dette gløymer du ikkje med det første. Seige greier!

Vokalen i seg sjølv er meir brutal enn før - noko eg ikkje trudde var mogleg. Dette pirrar meg på ein måte som eg ikkje heilt klarar å sette ord på. Eg vil høyre meir, eg vil høyre nye, ferdigproduserte låtar, eg vil ha ei ny plate. Purified klarar å gjere det mørkare og meir brutalt, men på same tid behalda det som kjenneteiknar dei.

Etter å ha høyrt dette demomaterialet er eg forferdeleg spent på kva som kjem frå dette brutalt råe orkesteret i framtida! 

Patrick Fardal