Barren Womb - Crown Control

For litt sidan hadde me premiere på låta "Leaning Tower Of TISA", ein av 5 frå Barren Womb sin komande EP Crown Control. EPen kjem ut på sjølvaste Record Store Day den 22. april gjennom All Good Clean Records, og er skitten, akustisk og full av det som er bra med støvete western-rock. Banjo folkens. Banjo.

For å gi deg eit lite bilete av kva underteikna tykte om opningssporet "Leaning Tower Of TISA" gjentek eg rett og slett det eg skreiv i premiere-artikkelen: Denne låta er skikkeleg heftig! Ein røff, western-aktig vokal og eit støvete lydbilde du må få med deg uansett kva sjanger du likar. Harde saker frå eit dystopisk univers fullt av pistolduellar og skitne barar midt i ørkenen. Dette stemmer framleis, men no når eg har teke eit stort jafs ut av heile EPen sit eg med eit mykje klarare bilete av kva dette eigentleg er - eit nedstrippa, brutalt ærleg produkt. Du finn ikkje noko fløtepus-vokal her, og du finn ikkje eit reint lydbilete - men i dette tilfellet er det utelukkande positivt. Og du får banjo for alle pengane! Berre det er jo steintøft. 

Og med det har eg eigentleg beskreve heile EPen, utanom siste låt, "Enola". Dette er ei utruleg fin låt, med den mest usminka vokalen eg har høyrt på lang tid. Denne er også meir fyldig enn dei andre, med trommer, gitarar og eit fyldig lydbilete. Veldig bra tekst er det også, og heile låta er med på å dra meg inn i ein historie - eg får litt triste vibber då, det skal seiast. Rundt 3.40 og utover kjem det eit skikkeleg feitt parti som eg godt kunne høyrt fleire gonger! Knall oppbygging. Ellers får du servert eit rått refreng i låta "Freak Flag" og ein rå akustisk gitar i "Telescreen Bible".

Det er ikkje alle låtane på denne EPen som gir meg like mykje. "Leaning Tower Of TISA" er framleis ein favoritt, med "Enola" tett følgjande bak. Men dette er definitivt noko unikt, og Barren Womb har laga ein soundtrack som godt kunne vore med i seriar som True Blood og Hell On Wheels. 

3.5/5 TRYNER!

-Patrick Fardal