What The Fuzz 2017
Som dei fleste veit så er den norske undergrunnen eit av dei viktigaste tinga for Evig Lyttar - slik kjem det alltid til å vere. Denne sida blei laga for undergrunnen, og den kjem alltid til å fokusere på nettopp dette.
Då skulle det berre mangla at me støttar opp under eit fantastisk kult initiativ - nemleg What The Fuzz 2017. Kva er dette, spør du med vidopne auge? Jau, det skal eg fortelja deg. Dette er 6 råfeite band som har gått saman for å gi deg 4 konsertar full av fuzz, punk og rock som får øyrene dine til å rista og foten din til å trampa hol golvet - dette er altså noko du ikkje vil gå glipp av.
Rocketroppen kjem til å besøka 4 byar (som du kan sjå over her i banneret) og nåde deg om du ikkje møter opp. Dette er ein gyllen moglegheit til å få med seg rå musikk, men det er og ein gyllen moglegheit til å støtte 6 band som kjem rett i frå den norske undergrunnen! Ondt Blod har blitt nominert til Spellemannspris med den råfeite debutplata si Finnmark, Forgetaboutit serverer deg deilig punkrock som sender deg rett til statane, Fight The Fight sparkar deg i trynet med deilig, fengjande hardcore, Tiebreaker ristar deg i nakken med ein rockeeksplosjon, Maraton gir deg storslått, fuzzete og progressiv pop og Kindred Fever smeller til med rock full av attitude og knalltøffe gitarar.
Dette blir eit måltid alle musikkelskande personar kjem til å konsumere med lyst og glede, og på menyen er det berre gode ting! Kan det bli betre?
Evig Lyttar kjem til å dekke nokre av desse konsertane, både med meldingar og foto, men me kjem og til å køyre deg opp i forkant med litt påddkast, nokre intervju og mykje anna snacks, blant anna ei speleliste som du kan trykke inn i øyrene allereie no!
Følg med oss vidare fram mot 18.januar, og del alt me postar! Eg har eit sterkt ynskje om at dette skal nå ut til så mange som mogleg. Det tek ikkje lang tid, så ta deg nokre minutt!
Sjekk ut spelelista her (Maraton fins ikkje på Spotify endå, men eg fann ein musikkvideo som du kan sjekka ut nederst):
-Patrick K Fardal