Endogenic - Hunter

Endogenic legg ikkje skjul på at dei diggar band som Lamb of God og Pantera. Låtskrivinga deira legg seg tett opp mot inspirasjonskjeldene. Åpningssporet «Your Time To Bleed» er groovemetal frå øverste hylle, det fengjar godt og bandet syr saman death metal og thrash til ein sprengferdig kombo. Trommene er i ein klasse for seg sjølv. Det aller meste av trommearbeidet er av høg kvalitet og meget underhaldande, spesielt på «Rise To Existence» låter det ekstra tight og punchy.

Dei 4-5 første låtane kan eg digge, men heilheiten skurrar litt til tross for imponerande prestasjonar. Eg forventar ikkje at dei skal finne opp hjulet på nytt, men eg kjenner at ein god del av materialet her har eg høyrt før. Endogenic serverer eit mangfald av riff og saftige brekk men det blir fort mykje på ein gong. Plata består av 11 knallharde låtar og tilbyr lite pusterom. Personleg meiner eg at det hadde passa fint med nokre rolige moment for å skape meir dynamikk.

Lydmessig har bandet også ein del forbetringspotensiale. Først og fremst er vokalen veldig varierande kvalitet på, nokre gongar høyres den isolert og metallisk ut. I tillegg er gitarane uryddige og grautete på enkelte parti.

Endogenic treff ikkje heilt blink med Hunter. For ferske metalheads fell nok dette i smak men for min del opplevast det heile litt resirkulert. Dette er nok knalltøft i ein livesetting der ein fokuserer meir på moshing og headbanging istadenfor innhald.

2,5/5 TRYNER!

-Jarand Aga Baas