Metaspion - Folktronika Schmolkfonika

Metaspion har produsert ei mildt sagt samansett plate, i eit ambisiøst forsøk på å smelte saman to vidt forskjellige og fargerike sjangrar. Dette er ein subsjanger eg ikkje visste eksisterte, kanskje var dette til min fordel? 

Som tittelen hintar om har Metaspion bakt inn folketonar i eit typisk EDM lydbilete. Til tider fengande, men eg merkar fort at tankane vandrar andre stader. EDM er nok ikkje «min» musikk, men spaning må være til stades uavhengig av sjanger. Den umiddelbare reaksjonen min er blanda, då det heile eksploderer som ei bombe i ansiktet mitt. Flotte felemelodiar, synthhooks, samples og MYKJE bass. Mange impulsar her altså.

Det som er av folkemusikk å finne her, er vel og bra. Likevel klarar eg ikkje å la meg overtyde om at dette er ein ny sjanger eg vil henge meg på. Sjølve skjelettet i låtane, nemleg den sprengferdige bassen og perkusjonen skapar driv mens resten av lydmassane druknar. Dette gjer det utfordrande å skilje låtane frå kvarandre. Produksjonen og lyden er det ingenting i vegen med, det let svært og stort sett ryddig. «Tveitaaen» er kanskje platas høgdepunkt, mest fordi det er fengande og vokalen stikk seg endeleg fram. «Worry» set eg også pris på, då melodien er på plass og låta har ein interessant oppbygging.

Som nemnt er ikkje EDM i utgangspunktet min kopp te, då eg synes det ofte vert einsformig. Metaspion skal ha for å gjere ting annleis og for å tore å eksperimentere. Å gjere folkemusikk aktuelt for fleire er eg absolutt med på, men eg trur dette vert for banalt.

3/10 TRYNER!

Jarand Aga Baas